“AUA NE’I FA’AGALO A’AFI’A I SI ONA VAO” (Samoan Text)
Fa’atalofa atu i lenei taeao i le pa’ia ma le mamalu o si o tatou atunu’u o Samoa, nisi fo’i o le a fa’afogafoga mai i lenei fo’i taeao i se upu fo’i po’o se alagā’upu ua tatau ona avatu i lenei taeao.
O lo’u igoa o Lemalu Pualagaseiina Afuie Pua’auli.
O le a amataina loa se fa’amatalaga e uiga i se alagā’upu. O le alagā’upu lenei, ua tele ina lauvivilu ai le tele o le atunu’u. O le tele o nisi o le atunu’u, latou te malamalama lelei iai. Ia a o le tele fo’i o nisi o le atunu’u e talanoa ai ma fa’aaoga i latou lauga, ae tele ina le malamalama ai.
O le alaga’upu la lenei “AUA NE’I FA’AGALO A’AFI’A I SI ONA VAO”
O le mafaua’aga o le alaga’upu lenei, e mafua i le tamaita’i o Sina.
O Sina sa nonofo ma le Tui-Fiti i Fiti. Ua alua’i, alua’i, ua agaleagaina e le Tui-Fiti, alu loa Sina i Samoa e sa’ili lona Aiga.
Ina ua taunu’u atu Sina i Samoa, ia ua alu atu loa, ua va’ava’ai atu ua taunu’u tonu a i gatai o Falealupo.
Ona alu atu loa lea o Sina, ua va’ava’ai atu i le matagofie o le togala’au i le matafaga i le nu’u o Falealupo. Ua alu atu loa lenei tamaita’i ua nofonofo ai ma fa’asolosolo ai ona mafaufauga, po’o fea o le a aga’i e sa’ili ai lona Aiga.
Ae manatua fo’i Samoa, o aso ia sa itulua tagata. Ina ua malama mai le taeao, ua sauni loa le tamaloa lenei, o A’afi’a, e alu e asi lona togala’au i falealupo.
Ae alu atu le tamaloa, o nofonofo mai ai le tamaita’i nei o Sina. Ia alu atu loa le tamaloa ua fesili loa i a Sina po’o ai lona igoa ae o fea fo’i e sau ai.
Ae tali Sina “O lo’u igoa o Sina. Na o’u sau mai i Fiti e asi lo’u Aiga i Samoa”.
Fai mai loa le fa’amatalaga o le tamaloa lenei o A’afi’a “Ia ua lelei, o le a e sau ta o i lo’u fale, o le a ta nonofo ai ma o’u tausia oe”
Sa iai la le tamaloa Toga ina onapo, e aluatu e alu i le nu’u lea o Tufutafoe. O le fa’amatalaga i na onapo o le tele ia o le au Toga e nonofo i Tufutafoe.
Ua alu atu loa la le tama Toga lenei ua mana’o ai loa Sina. Ua mana’o ai Sina i le lalelei o le Toga. Fai mai loa Sina i a A’afi’a “Fa’afetai i lou agalelei, a’o a’u, o le a ma o ma le Toga i Tufutafoe”.
Fai mai loa le fa’aupuga a le tamaloa lenei o A’afi’a,”Ia ua lelei Sina, sau ina alu, ae aua ne’i galo ia te oe la’u tala lenei. “AUA NE’I E FA’AGALO A’AFI’A I SI ONA VAO”
Ia e manatua, o le vao o lo’u fanua po’o le vao o lo’u togala’au lea na lavea’iina oe, lea fo’i na e ola ai.
A tu’u mai i le fa’aleagaga, ia manatua fo’i na mafua ona maliu le Alo o le Atua ona o le alofa i le lavea’iina o oe ma a’u.
Auā ana lē lavea’iina e A’afi’a, ia e fa’apenei, tatou te lē o iloa po’o fea o iai.
A tu’u mai i le fa’aleagaga, ia manatua fo’i na mafua ona maliu le Alo o le Atua ona o le alofa i le lavea’iina o oe ma a’u.
Ia tau ina fa’amanuia le Atua i lenei taeao i lau fa’afofoga’aga Samoa,
Soifua ma ia Manuia!
Fa’afetai
